ديوان الشاعر ( فهد المســاعد ) ..

[اميرة احلامي]

.. < فهــد المســاعد > ..



ولد الشاعر فهد المساعد عام 1398 هـ في مدينة الرياض
وعاش 4 سنوات في مدينة الرياض لينتقل بعدها إلى مدينة الرمحيـة ثم
اكمل فيها دراسته الى المرحله الابتدائيه وانتقل بعدها إلى مدينة رماح
لاكمال دراسته .. وعند بلوغه السادسه من عمره انتقل والده إلى رحمة الله
وبعدها بدأ المساعد رحلته في البحث عن الذات كما يحب ان يسميها
فتنقل مابين جامعة الملك سعود معهد الإدارة العامة
طالبا ً وبين عدد من جهات العمل ليستقر به المطاف أخيرا ً موظف في
شركة الاتصالات السعودية ..

بدأ فهد بكتابة الشعر وهو في سن الـثانيه عشر من عمره
وبدأت دائرة الشهرة تتسع لدى فهدقبل خمس سنوات
عندما كان يقضي أحدى سهراته مع أصدقاءه ..
وفي أحد الليالي أستوقفه أحد الحاضرين وطلب منه تكرار أكثر من قصيدة
ليكتشف فيما بعد أنه الشاعر والصحفي / أحمد الفهيد
والذي كان صحفيا ً في مجلة شعر و فروسية حينها
و أخذ قصائد فهد ليقوم بنشرها ..

أول قصيدة نشرت للشاعر كانت بعنوان " دفتر أوجاعـ ـي "
نشرت باسم فهد السبيعـي

كما تغنت الفنانة الراحلة " .. ذكرى .. "
بقصيدته الشهيرة ( المدينة و الغريب )

[اميرة احلامي]

ثــــلاث سنــــــين


ياعين هلي دموع الوجد وانهمري
محتاج لي دمعتين تعيد ترتيبي

نويت دمر الزمان اللي نوى دمري
بايعك ياطيبتي شاريك ياطيبي

والدانه اللي تغنج كنها القمري
أمنتكم بلغوها يا مناديبي

لاعاد تشفق على نخلي ولا تمري
ولا عاد تشره علي في قل ترحيبي

إن كان ربي عطاها لونها الخمري
الله بنفسي عوضني فقر جيبي

أمنتكم الله بلغوها تحتري جمري
مادام مافاد معها حسن تهذيبي

إن عشت والله لأمشيها تحت أمري
وأحس فيها تعذب كثر تعذيبي

هذريت فيها ثلاث سنين من عمري
وان قالها الله لأخليها تهذريبي

[اميرة احلامي]

ســـــالفة عشــــــاق


من بغى الفرقا .. لقى له عذر وأسباب ودليل
خل عنك العذر والأسباب دام الحب ضاع

كان ودك بالفراق ابشر عسى عمرك طويل
لاتردد وأنت لك كلمه ولك أمرٍ مطاع

لي عليك انك تبت بكلمه تشفي الغليل
ولك علي إني لأوقف وقفة الرجل الشجاع

لاتجاملني مخافة قال مدري خوف قيل
عمر هرج الناس مايسمن ولا يغني جياع

كان قصدك سر حبك اوعدك لأصبح بخيل
واحمل أسرارك معي للموت قدر المستطاع

بس قلها .. قل ما احبك .. وابشر بصبرٍ جميل
لاتحسب إني مثل من طبعهم لوي الذراع

صاحبك ماهو كذا .. ياصاحب القد النحيل
صاحبك طبعه غريب وغربته غربة اطباع

فالهوى مايقبل الحل الوسط ولا القليل
مثل ماهو لا شرا يشري اليامن باع باااااع

ثابتٍ لو هي تميل الأرض حدره مايميل
يدري إن الفقر ماهو عيب والدنيا متاع

ماعشق لذة حياته كثر عشق المستحيل
ولا كره حتى مماته كثر كره الانصياع

كم تعلمت من شديد البدو وش معنى الرحيل
وكم تعلمت من غروب الشمس وش معنى الوداع

وكم تعلمت من سحاب الصيف وش معنى الحصيل
وكم تعلمت من ليال البرد وش معنى الضياع

إيه .. أنا هذا .. طريقي موحش وصعب وطويل
وانت لامنك تعبت العالم فجوجه وساع

اعتبرني في بداية سكتك عابر سبيل
ورح وأنا قلبي معك من وين وجهت الشراع

يكفي إني لاذكرت بسالفة عشاق قيل
عاشر احبابه شجاع وفارق احبابه شجاع

[اميرة احلامي]

أعـــــز إنســـــــــان






صوّت حبيبي وقبل أقول ياعونك
شكا جروحه ورحت اشكي له اطعوني

يقول ما اقدر أعيش اليوم من دونك
وأقول حتى ولو ماعشت من دوني

يمكن أنا أكون اعز إنسان فعيونك
بس انت والله كل الناس فعيوني

لاصرت ربعي .. وداري فيّة اجفونك
وش دخّل الناس خل الناس يجفوني

يكفيني إن انت لامن قلت وشلونك
تطيب كل الجروح ويختلف لوني

وان كان منت بمصدقني على هونك
تعال طالع ادروبك وين ودوني

اصبحت اجامل اعداي اللي يحبونك
واكره مشاهد اعداك اللي يحبوني

ومن كثر ما أحب واكره عنك واصونك
اصبحت دفتر مشاعر وأنت مضموني

إن غبت عني شعرت بلذة طعونك
وان شفت زولك شعرت بقيمة عيوني

[اميرة احلامي]

الجـــــــــرح



ياصغيّر السن قدرك طاحت أبراجه
الجرح خلى الصخر ينطق ونطقني

خلاص ماعاد تعنيني ولا حاجه
رح جعل ربي يوفقك ويوفقني

من بعد ما كنت نور العمر وسراجه
اليوم صرت الظلام اللي يطوقني

عطيتك أكثر من اللي كنت تحتاجه
أسرفت فالحب لين الحب وهقني

خلاص مالي ومال الحب وإزعاجه
مالي ومال الدروب اللي تضايقني

تعبت أضم البحر واهدي أمواجه
تعبت أجامل وأشوف الوقت يسرقني

شكواي للي عليه الضيق وافراجه
اللي إذا شاء يرحمني ويرزقني

أما انت يابو جبين عقّد احجاجه
لاعاد تسأل علامك منت طايقني

الناس كلٍ على دربه ومنهاجه
وأنا عن الناس مابه شي يفرقني

إلا اني دايم أحب الصدق وأواجه
مخلوق والله على هالوضع خالقني

حتى رفيقي ضماد القلب وعلاجه
على كثر ما أتمسك فيه صدقني

لو ادري انه مرافقني على حاجه
لاامسّكه حاجته وأقول فارقني

[اميرة احلامي]

يبــــــــــــــــــــــه




يبه وأنا بعد (( 12 )) عام حسيت
اني قدرت أقول شيٍ كتمته

ابطى قصيدي ما أنكتب فيك وابطيت
اجر صوتي وارجع اجر صمته

ما ودي اكتب بيت واندم على بيت
ماهو بشعر .. الشعر كاني زهمته

الشعر كانه ما انحنى لي ما جيت
إن ماعزم مرثيتك ما عزمته

إن ماكتبته بأزرق الدمع وأبكيت
كل الجروح المبطيه ما رحمته

يبه وأنا من بعدك أبو التناهيت
ما مر طعمٍ للحزن مانهمته

يبه .. (يبه) كلمه وأنا كل ما أوحيت
كلمة يبه ((صديت والوقت لمته))

يبه .. (يبه) كلمه وأنا كم تمنيت
اهدم بها وابني بها اللي هدمته

يبه وأنا لاضقت رحت وتهجيت
ركون بيت ضم حلمٍ حلمته

يومك تعلمني ولامن تحاكيت
درس الحياه اللي كبرت وفهمته

هناك كانت دلتك لاتقهويت
وهناك كان يساق طيبٍ حشمته

وهناك إيه اذكرني .. هناك خليت
طفلٍ ملى بالدمع دربٍ رسمته

هناك جاني علمك انك توفيت
وهناك خاويت الشقا واحتزمته

واليوم قلت اليوم يومي ومديت
كف القصيد وطاح شعر ونظمته

لكن بعد صمت (( 12)) عام حسيت
اني عجزت أقول شيٍ كتمته

[اميرة احلامي]

ناس فوق وناس تحت

صعب لامنك فشلت وصعب لامنك لقيت
إن من يكره نجاحك يدري انك ما نجحت

امس ضقت ورحت اقلب ذكرياتي وانتهيت
عند صورة طفل صوته مثل صوتي لا انجرحت

وش مثل ؟؟ لا والله إلا هذا أنا يوم ابتديت
انطق حروفٍ تلعثم في لساني لا انمدحت

هذا أنا يوم الحياه فنظرتي عشرين بيت
ومسجدين ومدرسه من طين كم فيها اصطبحت

هذا أنا .. وأصبحت أتمتم .. (هذا أنا) حتى بغيت
اختنق بس القدر عيّا على موتي وطحت

وصاح صوت الطفل فيني انت من وين ارتميت
قلت أنا المستقبل اللي فيه كم همت وطمحت

امس كنت أبيك تكبر بس والله لو دريت
اني اللي عشت لجله مت عندك واسترحت

لو دريت إن الزمان يجر رجلي ما عديت
ولو دريت إن البحور بلا مواني ما سبحت

كان دربك لي طويل وكل ماشفتك هويت
قلت لك كبوة جواد وما كبيت إلا وجمحت

ليه تسمعني وتمشي آه ليتك مامشيت
وآه ليتك من كثر عثرات الأيام انتصحت

ضاعت احلامي وضل الحزن فيني واهتديت
للطريق اللي يوديني على دمعي ورحت

يالحزن ليتك مثل دمعي وتنزل لارقيت
بس أعرفك لو مسحت الدمع تبقى ما انمسحت

كان حلمي في وجود إنسان يبكي لابكيت
وصار حلمي في وجود إنسان يفرح لافرحت

كنت اشوف الناس مثلي كل ما جعت وضميت
ما دريت إن الاوادم ناس فوق وناس تحت

آآآه يا أول ذكرياتي خذني فحضنك نسيت
لأسألك عن وجه ابوي اللي معه ياما سرحت

خذني فحضنك ابغفى .. ياااااه مبطي ماغفيت
وان لمحت دموع عيني سو نفسك ما لمحت

خذني فحضنك وبعثر في جروحي وان قضيت
هزلي كتفي وقلي : عيب تبكي لو سمحت

اضحك وعلم زماني من أنا .. ومن وين جيت
طق باب الحزن واصرخ فيّ لامني فتحت

وضمني يمك .. وكمل ضحكتك لامن بكيت
ودي اذكر كيف كانت ضحكتي لامن فرحت

[اميرة احلامي]

رســــــــــــــاله


ياصاحبـي جيتـك اشكيلـك مـن أحوالـي
جيـت ومـادامـك رفيـقـي لـيـه أطوّلـهـا

العلـم ومـا فيـه يــا أول وآخــر أمـالـي
عندي رساله ولا ادري كيـف أوصلهـا

للـي سبتـنـي وأنــا مــن قبلـهـا سـالـي
أبيك توقـف معـي .. وتـروح وتسألهـا

وش فيهـا تفتـح علـي أبــواب عـذالـي
وتحـمّـل النـفـس حـاجـه مــا تحمـلـهـا

وش فيهـا رغـم الوفـا تتركنـي لحـالـي
وأنــا لجفـاهـا تـركـت الدنـيـا بأكمـلـهـا

إن كـان هـذا زعـل .. علمـهـا يالغـالـي
مـا كـان قصـدي ورب البـيـت ازعلـهـا

علمـهـا والـلـي يخـلـي قلـبـك الـخـالـي
عن ضيقتي وين وصلت من تجااااهلها

علمهـا كـم لـي وأنــا ماشـلـت جـوالـي
كـلـه علـشـاااان مــا اقـلــب رسايـلـهـا

وعلمهـا وشلـون لامــرت عـلـى بـالـي
أروح وأضــــم صـورتـهــا واقـبـلـهــا

وعلمها كيف انشغل عن كثرة أشغالـي
واسـرح واغمـض عيـونـي واتخيلـهـا

علمهـا عـنـي وعــن هـمـي وغربـالـي
علمهـا عـن كــل حـاجـه فــي تجهلـهـا

وان شفتهـا دنقـت تبكـي عـلـى حـالـي
انـسـى الـكـلام وتـذكـر كلـمـه وقـلـهـا

قــل شـاعـرك يعـتـذر ويعـاهـدك تـالـي
انـــه يـرتــب حسـابـاتـه مـــن أولـهــا

ويقـول حتـى القصيـد اللـي علـى بالـي
والله مـاعــاد اكـتـبـه كـانــه يـزعـلـهـا

[اميرة احلامي]

ياصاحبي


ياصاحبي بالله خل التغلي ............ وقت التغلي والدلع ذاك ولى

ماعاد معنا وقت تربط واحلّي ......... دامه عدو الحب بالصوت علّى

خذها صريحه .. حط نفسك محلّي ........... ادمح لك الزلاّت قدر وتغلّى ؟

ولّي حياةٍ جابت الذل ولّي ................. لابو حياةٍ صرت فيها تسلى

قولوله اني بنسحب منه كلّي ................ خلوه يدري ( من تغلّى يخلّى )

[اميرة احلامي]

جيت في ليله وادعه


جيت في ليلة وداعـــة تــايــة بين البيوت

صحت وينك جيت اودع عمري الي فيك ضاع

ماسمعت الا صدى صوتة وكان ارق صوت

ينطق اسمي ثم يهمس.. من متى انا احتريك..؟

قلت وهمومي تغافل زفرة الحزن وتفوت

"هذا انا جيتك ليت الموت جاني قبل اجيك .."

يعدها يادوب عدت عبرتة حد السكوت

قال وعيونة تغارق دمع .."بسم اللة عليك .."

قلت:.. يابن الناس عادي مورى هالموت موت

وش وراها لافقدت عيونك ولمسة يديك

[اميرة احلامي]

التــــــــــــوبه



تطيح دمعه واسلّم للفضا موقي
وارفع يدين الذنوب وتظلم أعماقي

اشوف قبري يمر بوحشته فوقي
وتصير كل الحياة أضيق من أخلاقي

يانفس طالت ليالي غينا فُوقي
كم قلت يالله وقلتي تونا باقي

ياالمزنه اللي تحن لغيها نوقي
تعبت أخيلك وأقول نياقي نياقي

تعبت ياما تعبت وضاعت احقوقي
ياما ندمت وردمت الذنب فأوراقي

ياما سكت وتركت البوح لعروقي
أخاف اسولف واخيّب هقوة الهاقي

أخاف أبوح ويخون الصمت منطوقي
وأقول شيٍ يحث الناس لفراقي

يالله وأنت الملاذ إن مس بي عوقي
وأنا ذنوبي جهت من راسي لساقي

يالله تغفر خطاي وترحم وتوفي
عظمي نهار الحساب وتقبل إعتاقي

[اميرة احلامي]

النـــــــــــاس


ياصاحبي لاتجي وتقول لي قالوا
لو قلت .. ماقلت غير الله يجازيهم

لاشفت بعض الاوادم للردى مالوا
نفضتهم من عيوني قبل اخليهم

يكفيني القدر نلته يوم ما نالوا
إلا .. أو أقول .. ما ابغى أجيب طاريهم

ما أقول غير انت لامن حطوا وشالوا
تعوذ برحمة الله من اساميهم

وذكرهم إن الأعمار إن طالت وطالوا
الخالد الذكر وإلا الموت قافيهم

أما انت ياقلب إن صالوا بك وجالوا
خلك مثل ما انت لاتشره على ايديهم

الناس من خلقة الدنيا ومازالوا
عيال رجال لكن فيهم وفيهم

ذولاك من عرض ناس مالي إن مالوا
إلا اني اسكت وأقول الله يجازيهم

[اميرة احلامي]

(( هدية عيد ميلادك ))



حبيبي جيت أقدم لك هدية عيد ميلادك
وأنا متأكد إني لو نسيتك مانقص قدري

ولكن قلت أدور أي شي يناسب أعيادك
تفحصت الهدايا لين ضاق بشوفها صدري

أبي شي يجملني معك لافاح رينادك
ما ابي شي أمده والخجل من فوقي وحدري

وقلت أشوف بعض الناس قبل يحل ميعادك
وش اللي من هداياهم يليق بوجهك البدري

بعضهم جاب ورد وشفت كل الورد مافادك
وأنا أصلاً اعتبر من جاب ذاك الورد ما يدري

لان الورد لو ما زاد بين ايديك ما زادك
تركت الورد وأعجبت بثلاثٍ جوك من بدري

هديتهم قفص وطيور .. قلت فعيد ميلادك
اسوي مثلهم وأهديك طيرٍ في قفص صدري

[اميرة احلامي]

المراسيل


أقول يمكن تنفرج فالمقابيل
ولا ادري إلا الأرض تحتي تهايل

وبعد التعب والهم والحط والشيل
توي عرفت إن البخت كان مايل

مع ذاك أبو ذيك الرموش المظاليل
ذاك الغريب اللي عمل بي عمايل

جتني مراسيله تشب القناديل
ومعها سؤالٍ جاوبته النحايل

يقول كيف الحال بعد المراسيل
وأقول مثل الحال قبل الرسايل

عمر الكتابه ما تجيب المواصيل
ريّح مكاتيبك ترا الشك زايل

إن ما حصل همس وحنان وتعاليل
وأعاتبك لين المح الدمع سايل

واجلس واسولف عن زمان البهاذيل
وانسى السوالف لا نسفت الجدايل

كذا يصير الحب والوصل والليل
وكذا ادري انك ما نسيت الجمايل

إما كذا وإلا اترك الحظ للميل
واتركني فوق الأرض تحتي تهايل

[اميرة احلامي]

إللي تركني


اللي تركني وأنا في عز غربالي
بعد الشدايد وش اللي ذكره فيني

يبغى زماني يعود ويرجع الغالي
وشلون يرجع بعد ماطاح من عيني

لا الوقت وقته ولا له شي في بالي
أنا نسيته مثل ماكان ناسيني

أنا تمنيت نظره منه في حالي
ياما تمنيت صوته لو يناديني

وأقول لأظلم علي الليل بلحالي
الله يجيبه يشتت غربة سنيني

من كثر ماكان طيفه دايم اقبالي
أحيان أحسه معي وتضمه ايديني

ولامن تنبهت لين وجيه عذالي
كلٍ على ماطرا باله يسميني

ليته تركني بعد هذا على فالي
زي ماتركته بعد قتله بساتيني

من بعد ماصار جاء بلسانه الحالي
يبغى يرجّع زمانٍ بينه وبيني

قولوا له إني ما أحبه كثر ترحالي
أو لا .. حرام يتضايق وإلا يبكيني؟؟

قولوا له إني أحبه .. بس من تالي
إن راح وإلا رجع ماعاد يعنيني

[اميرة احلامي]

لا تسافر



قلبي له اليوم .. ثالث يوم موجعني
وعيني لها اليوم ثالث تجمع طيوفك

والبال كنه على دروبك يوزعني
ولساني ماكنه إلا خلق لحروفك

لا النوم نافع ولا التفكير نافعني
أنام واصحى على الباقي من وصوفك

بالله قلي شعوري هذا وش يعني
طمني الله يطمن همك وخوفك

بيني وبينك ترا اللي صدق ضيعني
إن انت بآخر لقا شارح لي ظروفك

مدري وش أقول لكن تدري اسمعني
خابرك وافي وأبيك اتّم معروفك

إن كنت ناوي تسافر لاتودعني
بس انتبه لاتسافر قبل ما اشوفك

[اميرة احلامي]

المدينة والغريب



جاء يشوف الحال كيفه بعد ما هزه حنينه
وقبل يسألني سألته كيف حالك يالحبيب

قال أنا كني غريبٍ ضيّع أدروب المدينه
قلت أنا كني مدينه تنتظر رجعة غريب

قال اجل وش فيك تكره سيرة الحب وسنينه
قلت اجل وشلون ما اكره سيرته دامك تغيب

أنت لامن غبت حتى مرايتك صارت حزينه
كيف ما تبغاني احزن وانت لي حظ ونصيب

الهدايا والرسايل والمكاتيب الثمينه
والليالي والقمر والريح والكون الرحيب

كل ما تبعد تجيب ليّه الشعر من يدينه
وتقعد جروحي تودي فالطواريق وتجيب

يابعد كل القصيد ونزوة إحداه وأنينه
لاذكرتك لاح بيت وطاح ورد وفاح طيب

وان نسيتك مانساني صوتك المبحوح لينه
ياخذ لجرحي بثاره من خطاياك ويطيب

وبعد هذا جاي ترمي ذنبك بوجه المدينه
ما دريت إن المدينه كلها شمعة غريب

[اميرة احلامي]

الدلوعه



إيه اعرفك بنت عز وكلمتك مسموعه
وادري انك من خلقتي في ظلال وفيّه

مالعب فيك الزمان ولا قرفتي جوعه
ولا وقفتي من همومك وقفة محنيّه

ادري ورب اليتيم اللي يهل دموعه
مابعد هلت دموعك في ضحى عيديّه

بين حضن أمك وأبوك وردةٍ مزروعه
طول عمرك مافقدتي لمسة الحنيّه

إيه اعرفك واعرف إن الناس لك متبوعه
وادري إن امرك مجاب وحاجتك مقضيّه

بس أنا من فضل ربي هامتي مرفوعه
ورث أبوي وراس مالي عزوة جبريّه

ما انحنيت إلا لمخافة ربي المشروعه
ولا بعد دفقت دم الوجه أمد ايديّه

بدويٍ ماعرفت الضحكه المصنوعه
احمد الله من خلقت وطيبتي فطريّه

قانعٍ في حكمة الله ماشيٍ في طوعه
ماحسبت حساب دنياً ناسها طرقيّه

إيه أنا يا ام الترف قلبي إذا موضوعه
الفراق اللي بلا رجعه وطاري جيّه

بس روحي سايري قلبك وهدي روعه
واعذريني .. وإلا .. عادي ازعلي عليّه

دامها وصلت لذل النفس يالدلوعه
والله إن يعيش راسي ما انحنى لبنيّه

[اميرة احلامي]

(( يانديــــــم الجـــــرح ))


يانديـم الجـرح واللـي وصتّـك بأرقامهـا
عارف انّك ما تعـرف الا شـذى يشمومهـا

لا تعلمني عـن آخـر مـا حصـل فأيامهـا
من رسالتهـا عرفـت اليـوم كـل علومهـا

أدري إن الوقت شمّـر عـن يديـه وضامهـا
وأدري إن الحظ الأقشر صار مثـل هدومهـا

وأدري إن الهم وقّف فـي طريـق أحلامهـا
لين صار الحزن أثرها .. والشقى مقسومهـا

بس تستاهل .. هي اللي طاوعت مـن لامهـا
وباعت اللي كل ذنبه .. مادخل فـي سومهـا

خلهـا تدفـع ثمـن غلطاتهـا مــا دامـهـا
همّّلت قلبي .. وراحت .. وأسرفت في حومها

يبتعد مع كل خطوه .. صوت وقـع أقدامهـا
وتقرب الضيقه .. وتصحى دمعتي من نومهـا

لين غابت عن عيونـي .. وأنجلـى هندامهـا
ليلةٍ .. تغفى علـى صـدر الظـلام نجومهـا

كنت احس بشـيّ .. والله ماتشيـل عظامهـا
لو تحس بشييّ منه .. يمـر وسـط حلومهـا

كنت احس إن الضلوع العـوج مثـل أيتامهـا
وأشعر إن القلب نبضه منتهـي مـن يومهـا

والحيـاه اللـي تـدور شهورهـا وأعوامهـا
وقّفـت .. واليـوم دور رماحهـا وسهومهـا

ياكثر ما اغرقت نفسي فـي بحـور اوهامهـا
وياكثر ماضعـت بيـن أوهامهـا وهمومهـا

مـا جـداي إلا احلـم انـي واقـفٍ قدامهـا
وأتخيلـهـا تعاتبـنـي .. وأروح ألومـهـا

يانديم الجـرح .. خلّـك مـن علـوم أيامهـا
مابقى فـي القلـب رغبـه يلتفـت لعلومهـا

والرسالـه ردّهـا للـي زمنـهـا ضامـهـا
وقلها كلمـه .. وتفهمهـا حسـب مفهومهـا

والله أن أقـص كفـي قبـل .. أدق ارقامهـا
والله أن اشيل قلبي .. قبـل أشيـل همومهـا

[اميرة احلامي]

(( دمعـــــة ملك .. غيمه مستقله ))



ياسيدي والقلب له صـوت مسمـوع
الياتكلـم .. ينصـت الكـون كلـه

وقلوبنا يمكـن لهـا ثالـث أسبـوع
مافارقتهـا صورتـك فـي المجلـه

يوم أنها طاحت من عيونـك دمـوع
لعيون طفـل ٍ فـارق عيـون خلّـه

طفل الشهيد اللي على أبوه مفجـوع
أليـن شافـك ياضـمـاده وظـلـه

ثم أنفجر من صوتـه الغـظ ينبـوع
وغنّى " وطنّـا كلنـا فـدوة ٍ لـه "

قمت وحضنته كن ماحولك جمـوع
قاسمت حتى الطفـل دمـع ٍ يهلـه

يابو اليتامـى كلنـا سمـع ٍ وطـوع
فـك غمرنـا يالحبـيـب المـولـه

ودمعاتك اللي هزّت ضلوع وضلوع
أكبـر دليـل أن المحبـه مــن الله

يانبضنا اللي كم هدى ب أسمه الروع
ادربنـا الـلـي نهتـديـه ونـدلـه

ياتاجنا اللي يودع الـراس مرفـوع
لغزنـا اللـي خفقـة القلـب حلـه

نهيم فيك هيام ونجـوع لـك جـوع
اأصدق سبـب لوجيهنـا المسفهلـه

حبك هنا بيـن المعاليـق مـزروع
تسقيـه غيمـة عطفـك المستهـلـه

ربي يديمك يـاذرى كـل مفـزوع
ربـي يعينـك يابـو الشعـب كلـه

أقولها والقلب له صـوت مسمـوع
طلـق حجاجـك يالسنافـي وفـلّـه

لك في يدين أطفالك ورود وشمـوع
في قلوبهـم لـك غيمـة ٍ مستتقلـه

ولك من زنود عيالك سيوف ودروع
الكـل منـهـم ودّه أنــك تسـلّـه

آمر يابو متعب لك السمع والطـوع
لوودك نجيـب البحـر مـن محلـه

ماهو كثير أن قلت يفدونـك جمـوع
يـاالله عسانـا مــن فـدايـاك لله

اللي طفل من شعبه أصخى له دموع
ارواح شعبـه كلهـا فـدوة ٍ لــه

[اميرة احلامي]

(( كذبــه كبيــــره ))



اتعبتنـي عيـونـي قــدّ مـاهـي بصـيـره
واتعبتـهـا يديـنـي قــدّ مـاهـي جـفـول

قلت : "خيره".. ولكن وينهـا و ويـن خيـره؟!
لا عيـونـي تـكـفّ.. ولا يديـنـي تـنــول

هيه.. وين انت يا للي كـان مـا فيـه غيـره؟!
يفهـم اللـي اقولـه قبـل حـتـى لا اقــول

رحـت ادوّر حبيـبٍ مثلـك ابغـى استشـيـره
واثـر مـا كــل زولٍ ينتـعـوّض ب (زول)

جيـت نـاسٍ تـزوّد حيـرة القـلـب حـيـره
قلـت : "اطيـع الزمـان وكـل شـدّه تـزول"

قالوا : "العمر يكبـر".. قلـت : "كذبـه كبيـره
عمر الانسـان يصغـر كـل مـا هـو يطـول"

قالوا : "الشعر بيت".. وقلت : "انا الشعر ديره..
..اعقـل اللـي سكنهـا فيـه طيـش مهـبـول"

قالـوا : "اللـي فقيـر يحـب وحـده فقـيـره"
قلت : "واللـي يحـبّ يحـب وحـده خجـول"

قالـوا : "و ذيـك هـيّ الأولـه والأخـيـره ؟"
قلت : "ما ادري.. او ادري بس ما ابغى اقول"..!

[اميرة احلامي]

(( وحــده بوحـــده ))


ياغايـبـه وان كــان فيـهـا جـمـالـه
تجمّـلـي يــاام الـحـلا والظـفـايـر

بالله شوفـي صاحـبـك كـيـف حـالـه
شوفيـه فـي غيبتـك وشلـون صايـر ؟!

صارت حياتـه ضيـق خلـق .. و بطالـه
هم .. وسهر .. واوراق شعر .. وزقاير !!

يعنـي حبيبـك صـار حالـتـه حـالـه
مابـاقـي الا انــه يــدّن العـبـايـر

الله لامـنّــه ذكــــر مـامـضـالـه
قـبـل الـدوايـر ماتـجـر الـدوايــر

يــوم الطفـولـه والشـقـا والجهـالـه
يـوم الصغايـر فـي عيـونـه كبـايـر

ايــام كــان معـانـده راس مـالــه
ويـسـوق لهـبـال الشـقـاوه بشـايـر

يامـا امتلـى بالحـب والطـيـش بـالـه
ويامـا امتلـت مـن شخبطتـه العـوايـر

يكتـب عليهـا : ( عااااشقـك للثمـالـه )
ويخـطّ توقيعـه : ( جريـح الضمايـر )

يامـا اشتكـاه ابـوك فـي بيـت خـالـه
ويامـا تحصّـل مـن هـواك العـزايـر

مـره حـلـف بـأنـه يبّـطـل هبـالـه
وقبـل يكمّـل .. فـك اخـوه الستـايـر

ثـم طالـع الشـبـاك.. ليـنـك قبـالـه
وفي اقل من لمـح البصـر جـاك طايـر

علـى صغـر سـنـه ممّـيـل عقـالـه
كااااشـخ وناسـي لايـصـك الـزرايـر

لاشـافـك يتمـتـم لـحـالـه بـحـالـه
لعيـون هالشـوفـه تـهـون الخسـايـر

ولاشـاف زول ابـوك حــذّف نعـالـه
الحـب جايـر .. لكـن العـود جـايـر

طفـلٍ يتيـم ورغـم الأحــزان دالــه
مايـدري ان حظـه مـع الوقـت بـايـر

كنتـي طموحـه .. كنتـي أغلـى حلالـه
كنتـي وصرتـي بـس يــاام الظفـايـر

طفـلٍ زرع مـن ضحكتـك فـي خيالـه
ليـن اثمـرت شعـرٍ هـزالـه حـرايـر

لاتتركيـنـه فــي غيـابـك لـحـالـه
بالله شوفـي كـيـف هالطـفـل صـايـر

ووحـده بوحـده كـان عـنـدك عـدالـه
اتبّطلـي غيـبـه .. و ابـطّـل زقـايـر

[اميرة احلامي]

(( الموانــــي ))

حبيبـي دام انـا أصـلاً حبيبـك وانــت والفـنـي
اجل وشفيك تزعل يـوم افضفـض وانفـض ايامـي؟

انا لولاك.. قلت : "ان الزمن ب اموت مـا انصفنـي"
وانا لولا الزمن مـا كنـت اهوجـس وانـت قدامـي

هي الدنيا كـذا .. لا جيـت ارتّـب للكـرى جفنـي
تكاثـر غفوتـي حتـى تصيـر ابعـد مـن احلامـي

هي الدنيا كذا .. و ان كـان مـا صدّقتنـي .. شفنـي
شف عيوني .. وشف وش لون جلدي يستـر عظامـي

شف..أو.. لا.. لا تشوف.. ان كان ودّك صدق تعرفني
تتبّـع سيرتـي .. او سكتّـي .. او جـرّة اقـدامـي

تتّبعـنـي واذا مـرّيـت دمـعـي لا تضاعـفـنـي
تعـدّ بخطوتيـن وشـف طموحـي كيـف مترامـي

هنـا طحـت.. وهنـا حظـي عثر..وهنـاك وقفّنـي
وهنـا مـاردّوا اللـي كنـت اناديـهـم بالآسـامـي

تهجّـى فالموانـي ليـن تـقـرا سالـفـة سفـنـي
تتبّعنـي مـن اول جـرح واتـرك عنـك هنـدامـي

وانا اقول : "ان تشوف اللـي يحـدّك مـا تحلّفنـي..
.. وش اللي حدّني ابقى علـى جـال النهـر ظامـي"

امانـه بـس لا تـزعـل عـلـيّ .. ولا تخالفـنـي
لو ابكيتك مـن همومـي .. او ابكيتـك مـن هيامـي

انـا لولاك..قلـت: "الوقـت هـذا مــا يشرّفـنـي"
ولولا الوقت قلت اني خذيت اكبـر مـن احلامـي !

[اميرة احلامي]

(( سحابـــه ))


جف الكلام ومـدت يدينهـا فـوق
.. أخترت هذي .. وأنت شف لك سحابه

قلت .. ويديني تحتضنها مثل طوق
أختـرت هـذي هـذي أكثـر رحابـه

هذي دفا صـوتٍ مـن البـرد مخنـوق
هذي سـؤالٍ نصـف عمـري جوابـه

هذي هي اللي عرّفتنـي علـى الشـوق
هذي قدر .. ماكنـت حاسـب حسابـه

قطعة حزن في جيـب بالـي ومشقـوق
ومضة فرح في عيـون نـاسٍ غلابـه

أن سولفت فـي ثغرهـا لمعـة بـروق
وإن سرّحت في عيونها صمـت غابـه

واليا اضحكت نورٍ من الفجر مسـروق
واليـا بكـت تحـزن عليهـا الكـآبـه

حبي لهـا لـوأدري ان فيـه مخلـوق
قدّ حـبّ مثلـه .. قلـت : "ياللغرابـه"

هالآدمي من وين له قلـب وعـروق؟!
والصبر هالمسكيـن مـن ويـن جابـه؟

وأنـا أتكلّـم .. ردّت عيونهـا فــوق
ثم تمتمت : من هي هالأكثـر رحابـه؟؟

قلـت ويدينـي تحتضنهـا مثـل طـوق
فـي ذمتـي ماشفـت غيـرك سحابـه

[اميرة احلامي]

(( سهم وقلوب ))

ياعـيـن كـفـي دمعـتـك لاتهـلـيـن
قـوي الصبـر هـذا زمـان العجـايـب

ماقـد سمعنـا رجّـع الـدمـع غالـيـن
ولاسمعـنـا رد دمـــع ٍ مـصـايـب

بـدل دموعـك حاولـي بيـنـك وبـيـن
قلـب ٍ عسـاه اليـوم ينسـى الحبـايـب

مااقول انسـي .. حاولـي كـود تنسيـن
خـلاص راحـت غايـتـك بالغصـايـب

الحـب قصـه والبطـولـه لشخصـيـن
وختامهـا كـل ٍ مـن الـحـب تـايـب

ماهـوب مثـل اللـي نظنـه مـن سنيـن
مانـدري انـه يـودع الـراس شـايـب

كنـا نظـن الـحـب يـرسـم بقلبـيـن
وسهـم ٍ علـى القلبيـن بالحبـر صايـب

واليوم اشوف الحـب فـي دمعـة العيـن
كـنـه غـريـب ٍ دون دم وقـرايــب

انشهـد انـه شـتـت الـحـظ أثنـيـن
راحـت وتهنـا فـي بحـور ٍ غـرايـب

راحـت وانـا واطلالهـا اليـوم باقـيـن
تـرقـب عيـونـي بابـهـم والهبـايـب

اذا انفتـح كـل الخفـايـا بــي تبـيـن
واذا تسّكـر جـاوب الـدمـع غـاايـب

انـا قـوي القلـب اصبحـت مسكيـن؟!
يحـق لـك يالعيـن خـاوي السحـايـب

ياعـيـن هـلـي دمعـتـك لاتمـلـيـن
غلطـان انـا يومـي ردعتـك وخـايـب

وآخر وصيـه مـن فهـم حالتـي زيـن
وآمـن بقلـب ٍ راح فـي الحـب ذايـب

ينحـت علـى قبـري رمـوز ٍ بحرفيـن
وينحت سهـم وقلـوب فـوق النصايـب

[اميرة احلامي]

(( دفتر أوجاعي ))

اكتب واسلّي خاطـري ب (الكتابـه)
كود التهي في نظم الابيـات وانسـاه

واثر القصايـد منـه قامـت تشابـه
من وين اقلّب دفتر اوجاعـي القـاه

هـذي قصيـده قلتهـا فـي عتابـه
وهذي قصيـده قلتهـا يـوم فرقـاه

وذيك القصيـده قالهـا مـن عذابـه
يكتب قصيدٍ منكسـر بـس محـلاه

ويقول: (( جابه كان تقـدر تجابـه))
واقول شعرك لعن ابو مـن تحـداه

ويروح يضحك ما اقتنع في الاجابـه
ويقول: (( شعرك زين بطّل محابه))

واقول: ((طبعا زين ل (انّك) زهابـه
لاصرت روح البيت شولون تبغاه))؟

واليـوم ذاك الوقـت جمّـع شبابـه
واقفي ولاادري صاحبي ويـن وداه؟

ورضيـت مـدري ذل ولا مهـابـه
ابعد واهـلّ الدمـع ل (ايام)ذكـراه

الشعـر والليـل وبيـاض السحابـه
والضحك والحظ الـردي والمعانـاه

كلّـش يذكرنـي بـوقـتٍ غـدابـه
ياوين اب ( رمي) هالجسد فيه وانساه

[اميرة احلامي]

(( القلوب الطيبـه ))


يادلال ان ضاع صوتي لايضيع اللي بقـى
لاتضيع الصورة اللي في خيالـك يـادلال

يابعد طول المسافـة والكلافـة والشقايـا
بعد كـل الحيـاة وكـل ماجـاب الخيـال

ماورى سـود الليالـي والفـراق إلااللقـا
وش تبين بهالدموع الزرق يابنت الحـلال؟

اتركي عنك الدموع وخلي الحـزن يهقـى
ان مالـه فالقلـوب الطيبـة أيـة مجـال

كلها جرح ونشـوف الليـل لامنـه بقـى
في جلال الصبح جعل الصبح مايلقى جلال

اقبلي قبل انتفارق والوصـال ابـو النقـا
ودي آخذك بيدينك والنقـا ولـد الوصـال

اقبلي واليوم يـوم الشعـر كانـه مارقـى
يم ذيك الغيمة اللي كنهـا (طلبـة تعـال )

لايجي باكر يغني : (ياسقـى الله وسقـى)
كل شي ان طال زال الا القصايد ماتـزال

لعن ابو ذكرى القصايد كان ذكراها محقـا
كل بيت وذكرياته في ملامحهـا سـؤال :

وينها اللي كنت انا والصبح ويديها شققـا؟
اي فال اللي رماني في خيالـك اي فـال؟

آه كان الشعر راح ورحتي انتي وش بقى
مابقى لي غير اجر الصوت وأسري يادلال

[اميرة احلامي]

(( بنت الشعر ))

ياقصيدي شد حيلك وأخذ من جورك عداله
وأنفض غبارك وطوّح باللحون السامريه

أبشر بعلم ٍ تسرّ البال رشفه من زلاله
أبشر بعلمٍ يجيب أقصاك ويردك عليّه

أبشر بـ ( ريف الضلوع العوج ) جت منها رساله
رجعتني للحياه وذكرّتني بالمنيه

أكتبت فيها : (( من سهول الشمال ومن جباله
_لأرض الأحباب وبلاد الحب _ إلى نجد العذيه

من صبيّه عاث فيها الوقت وأعياها أحتماله
للحبيب اللي يطيح فـ غيبته دمع الصبيه

يالحبيب أن مرّك أسمي في الرساله وأنت داله
أعتبر هاك الرساله طيش بنت ٍ نرجسيه

وأن قريت أسمي وطاحت دمعتك قبل الكماله
كمّل السطر الأخير وبلّغ الشعر الوصيه ))

وأكتبت لي فـ آخر سطور الغلا سطر ٍ لحاله
بشّرت في القصيد وجت تسوق الشعر ليّه

ياقصيدي وأنت عم القلب وجروحي خواله
لاتردّى ماخبرتك ياولد راعي رديّه

أقدح الشعر وتوّلم مانبي لـ أحدٍ جماله
مالها غير المساري والحروف الأبجديه

دامها لعيون بنت الشعر والحسن ودلاله
والله أن يقال فيها الشعر وتسوقه حميّه

العنود اللي تذّكر واحدٍ ماغاب باله
بالقصايد والرسايل وأسمها والمقدريه

كيف تسألني عن أسم ٍ هزّ له غصن وحدا له
شاعر ٍ من طول صمته ماهقيت ألقاه فيّه

ليتها تسأل جنوب القلب عن صحراء شماله
كم بقت رغم الهبايب في قفاريه الخليّه

وأن بغت تسأل قصيدي جعل يفداها خياله
تقلط هنيّا وتبشر بالسعد والشاعريه

القصيد أن كان ماانصف شاعره لاجا مجاله
وش نبي به يوم نكتب فيه ونحطه قضيّه

[اميرة احلامي]

(( برد وأيام واحباب ))


هب الشمال وطاح بين المحاديب
طفل ٍ على خدّه مشاريه وعتاب

والبرد شبّع جرد الأيام تعذيب
وأنا ضحية برد وأيام وأحباب

ياليل مالي غير حضنك معازيب
خلك معي لاشحّت وجيه الأصحاب

ماعاد هي لحية غرام ومكاتيب
لاوالله الا قرّبت صوب الأهداب

يابنت ياأم الضحكه أم المعاطيب
لاماك ذنب وشاعرك مابعد تاب

مرّت ثلاث سنين ياأغلى الرعابيب
والريح تشكي للشبابيك والباب

مرّت ثلاث سنين بين المراقيب
عدّيتها يابنت مرقاب مرقاب

في ذمّتي ماعاد أودي ولااجيب
حتى الشعر ماعاد ودّى ولاجاب

يابنت عندي كلمةٍ تقطع الجيب
بـ اقولها لو ماحسبتي لها حساب

طرد المقّفي مثل طرد العذاريب
وأنا تعبت أبلع مشاريه الأعراب

أما تعالي وأقطعي دابر الريب
والا انسي أني كنت انا وانتي أحباب

[اميرة احلامي]

(( صمت المكان ))

كل ماطابت هجوسي رحت اسولف للزوايا
عن فتاة ٍ كان يملى صوتها صمت المكان

عن فتاةٍ غير كل اللي قرينا في الحكايا
صمتها طيش وقصيد وطيشها صمت وأمان

باقي ٍ فيها من اللي في طفولتها بقايا
شيطنة ضحك وسوالف .. رقة شعور وحنان

كم تزاعلنا وكلٍ ينتظر دمح الخطايا
كم سكتنا والزعل من بيننا مثل الرهان

لين ماتنهي زعلنا ضحكة ٍ بين الشفايا
ضحكة ٍ غابت ولكن شانها مازال شان

ماذكرت الا عيوب ولاتركت الا مزايا
سوّد الله وجه حظي والليالي والزمان

راحت وخلّت دلعها صورةٍ بين المرايا
وين مالدّيت فيها شفت ضحكات الثمان

وشفت شامه فوق جمره سوّت بقلبي سوايا
آه ياهالحال منها كيف صار ووين كان

بس ياذاك الخفوق اللي تلجّ أبك الحنايا
شد حيلك لاتخاذل مايطيح الا الجبان

مالك الا ذكرياتك وأنت من بين الهدايا
حول ذاك الورد ابو عطرٍ يهز الشمعدان

كل ماخلّت وراها غالي ٍ ريم الصبايا
حتى والله من غلاها .. رحت وأغليت المكان

[اميرة احلامي]

(( القرايا ))

القرايا ساكنتنا لو سكنّا في المدينه
ياكثر مافي المدينه ناس تسكنها قرايا

مثل انا لامن شعرت أني بحاجه للسكينه
رحت يم القريه اللي قدرها بين الحنايا

قريتي واليوم جيتك شاعر ٍ هزّه حنينه
للوجيه وللبيوت وللسوالف والحكايا

قريتي انا فهد .. فهد .. فهد ماتذكرينه ؟!
أسألي عني بيوت الطين ونقوش الزوايا

ياسقى الله قبل اسافر عنك يالدار الثمينه
يوم انا طفل يشوف عيوب جدرانك مزايا

يوم انا طفل ٍ يمر اليوم ماشاف الغبينه
الضحى وسط المدارس والشفق بين المطايا

ياسقى الله يوم كنت الريح والدنيا سفينه
قبل مالدنيا تكون الريح والسفن البرايا

يوم ابوي الله يبيحه كان ياخذنا بيدينه
يم ذاك المسجد اللي فيه من ريحه بقايا

ياسقى الله او بلاش ازيد هذا الطين طينه
لي هنا والعمر مابه متسّع لـ اهل الرزايا

قريتي مانيب انا اول من رجع لك وسط عينه
دمعتين ٍ كنها لبيوتك وناسك مرايا

القرايا سالفة اهل القرايا في المدينه
والمدينه سالفة اهل المدينه في القرايا

[اميرة احلامي]

(( يبكون الحبايب فراقي ))


ياقلب طالـت قسوتـك وأنـت ليّـن
في قسوتك ياقلب ويش انت لاقي !؟

اللي تعـدّى عمـر ماهـوب هيّـن
والعالم الله كم مـن العمـر باقـي !

يمكن يطول .. ويمكن اليـوم أعيّـن
موتي .. ويبكون الحبايـب فراقـي

وش عاد أسوي وسط قبري وأزيّن ؟!
لاجفت عروق .. وعيون .. وسواقي

لا عاد بـه فرصـة عشـان آتحيّـن
ولا عاد به زفـرة وأفـك اختناقـي

باكـر وكـل اللـي سترتـه يبيّـن
وانا علـى هالحـال ميّـس وهاقـي

مـدري متـى يهدينـي الله وأديّـن
وأكف عن بعض المشاوير ساقـي !

[اميرة احلامي]

تمنيت موتكــ




اللي بقا لـي فـي غيابـك .. سكوتـك

واللـي فقدتـه مـن غيابـك .. حنانـك


عـذرك معـك لوخبرونـي ب موتـك

وحقي عليك ان كـان عـذرك زمانـك


ماكان موعد .. وأعـذرك لـو يفوتـك

أنـا انتظـرت العمـر كلـه عشـانـك


غبت ورضيت .. وبعدها .. غاب صوتك

وأبطيت أكذب .. من يقولـون : خانـك


بالله كيـف تحـس فـي طعـم قـوتـك

لامن ذكرت إنسان .. خنته .. وصانـك


ماكـن قلبـه واحــد مــن بيـوتـك

من تحت سقفـه كـم شعـرت بأمانـك؟


وراك خليـتـه .. لعتـمـة سكـوتـك؟

وأنـا م غيـر أعشمـه فـي حنـانـك


فـي غيبتـك ياكـم تمنـيـت مـوتـك

أقل شـي .. أرتـاح وأعـرف مكانـك

[اميرة احلامي]

(( رجعنا للقصايد والغــــلا ))




لعنبو بعض القصايـد كـان مافيهـا حـلا
ماتـروح الا وتتـرك للحنايـا جلجـلـه

تبتدي مثل المزون اللـي تسولـف للكـلا
ولاخذت قامت ترزّم مثـل شهـبٌ منزلـه

فوق صدر الشاعر اللي عن طواريقه جـلا
لين شاف اخت القصايد بالقصايـد مقبلـه

ياهلا بـاخت القصايد كثر شوقـي ياهـلا
اقلطي بين الحنايا وافهقـي جمـر الولـه

كل ضلعٍ من ضلوعي حافـظٍ درس الـولا
مثل حفظك للعفـاف وللشـرف يامدهلـه

سولفي كذا السوالـف تنسمـع والا فـلا
وان بغيتيني اسولـف .. اسألينـي اسئلـه

اسأليني وابتديها .. بالنهار اللـي تـلا ..
ليلة ان الجرح يقرا فـالضلـوع البسملـه

واسأليني عن زماني كم شرب فـيّ وكـلا
انتهي من مشكله والقى وراهـا مشكلـه

المشاكل بهذلتني في غيابـك ... والبـلا..
مالقيت اللي احـط السـر عنـده وازهلـه

كل مااسمع (كيف حالك) ينقبض جفني على
دمعةٍ تبغى تقـول الحـال دمـع ومهزلـه

وابلع العبره واقول : بخير والهـم انجـلا
وآخر الهرج آتلعثم فيـه وانقـض أولـه

ليه غبتي .. ليه غبتي وانتي اللـي مامـلا
عيني الا همس صوتك في زمـان البلبلـه

يااااااه شفتي وين راح البال بالشعر وسلا
؟قمت اعااتب فيك وانتي فـالضلوع مـدلله

لنّي ماصدّقـت نرجـع للقصايـد والغـلا
بعد ذاك اليوم يوم اجنبت وانتـي مشملـه

اييييه ماصدّقـت لكـن ياعسانـي ماخـلا
اقلطي بين الحنايا وافهقـي جمـر الولـه

[اميرة احلامي]

من عز نومي صحيت وشفت فـي عيني
دمـع تـهـادى عـلـى جفني وانـا غـافـي

سـتـرت دمـعي بكـمي قـبـل يغرينتـي
واخـذت هـذا الـجـسـد مـن بـاقـي لحافي

وسـريـت تـايـه ورى خـطوات رجلينـي
لاالوجه وجهي ولاأوصافي هي أوصافي

أمشـي واقـول لـطـريقـي لاتوديـنـي
لـعـيـون نـاس تـبـي تـدري عـن الـخافـي

أمـانـتـك...خـلـهـا مـابـيـنـك وبينــي
خـابـرك يـالـدرب خـوة عـمـر واسـنـافي

مـاودي الـنـاس تـدري وش يـبـكـيني
كـرامـة الـنـفـس ورث ابـــوي واسـلافي

أمـشـي واحس الخناجر في شرايينـي
والـبـرد يـمـشـي وراي ويـنـهـش اطرافـي

وحـيـد واللـيـل بـردونـه يغـطـيـنـــي
تـقـول كـن الـبـلـد روح بـهـا الـســافـي

إلـيـن مـاأوحـيـت صـوت يـنـاديـنــي
صـوت أعـرفـه مـثـل مـاأجهل وش خـلافي

قـمت أتـلـفـت وانـادي لاتـخـلـيـنـــي
مـاغـيـره...الـصـوت هـذا صـوته الـدافـي

ولمحت زوله من أقصى الدرب لافينـي
مـدري وش اقـول لـكـن حـي هـاالـلافـي

تعال...شف غيبتك كيف أثرت فينـي
تـعـال...شـفـنـي وانا أغرق عقب مجدافي

تـعـال...خذني ورحبي من عناوينـي
تـعـبـت أعـدي عـلـى جـمـرك وانـا حـافي

تـعال واقطف بصوتك زهرة سنينــي
كـل الـمـواعـيـد عـقـبـك شـمـعـهـا طـافـي

تعال وشفيك خايف؟ أنت ناسينـي؟
قـطـعـت صـوتـي عـليـك وطـال مـيقـافـي

حتى بديت أشعر ان الحب معمينــي
وأن أنـت حـلـم عـثـى فـيـنـي وانـا غـافي

لكن أمانه ترى اللي فيني كافينـــي
إن رحـت مـنـك كــــذا مـارحـت مـتـعـافـي

بـصـدق الـحـلم واحـذر لاتصـحيـنــي
فـي خـاطـري كـلـمـتـيـن إن قـلتـهـا كافي

أمانة الله عليك ان غبت عـــن عينـي
لايـكـون قـلـبـك مـثـل قـلـب الـزمـن جـافي

مـع كـل دمـعه تذكر رعشــة يدينـي
ومـع كـل ضـحـكـه تـذكـر قـلـبـي الوافي

[اميرة احلامي]

(( آخر دروبي ))





يابشر تكفون حلّو عن سمايه
مايصيب الهرج لو الهرج صوبي

كم سكت لكم بما فيه الكفاية
اشتموني لو زعلتوا واشمتوا بي

عيبوني واتركوني في عمايه
واتركوا لي واحدٍ يرضى عيوبي

اتركوا لي واحدٍ يمسح شقايه
كل ماحط الزمن دوبه و دوبي

ذاك والله لا ذكرت انه ورايه
أشعر ان الكون كله وسط ثوبي

يكفي انه لو يسولف للمراية
كنّ صوته يهمس لصورته ذوبي

كيف انا ما اذوب مادامه معايه
اسمعه واسهر معه لاخر ذنوبي

كل ما قال: السهر درب الغواية
قلت: كله من عيونك هبّلوا بي

كل ماقال: الخطا ماهو خطايه
قلت له: قل للعيون السود توبي

ضيعتني واسأل الله الهداية
وين اجيب العقل؟؟ اجيبه من جيوبي!

من يعرفك ما يدل العقل رايه
ياشروق العمر مدري يا غروبي

أذكر انك كنت لي مثل الهواية
لو تروح ولو تجي يبقى شحوبي

بس مدري كيف صرت اليوم غاية
صرت اجي واروح مدري عن دروبي

يا بعد عمر الكتابة والقراية
يا الشمالي يابو الملح الجنوبي

لا قريت اللي كتبته يا رجايه
رح وبلّغ ربعي اللي جننوبي

قل لهم يمكن يخلّون الوشاية
وان تمادوا خلّهم مهمها حكوا بي

انت خلك بس فـ الدنيا عزايه
لا تفكر فـ العواذل وانت صوبي

ادري انّه كل درب وله نهاية
بس انا باقي معك لاخر دروبي

[اميرة احلامي]

التفاصيل الصغيرة -

ازعل عليك احيان
وأزعل على نفسي قبل ماأزعل عليك

وأرضى عليك احيان
وأرضى على الدنيا وانا راضي عليك

وأنت عمرك
مازعلت .. وماعتبت ... ومارضيت

أزعل علي لو كذب
أعتب علي لو كذب

هذي التفاصيل الصغيره
اللي تخلينا نحب

ماأحب انا ازعل عليك
ازعل انا لأني احب

***

ياأدفي من حروف الشعر
ياأرق من حلم السنين

إذا تركتك تنتظر
حسسني إن انتا حزين

مابي تقول مسامحك
قل : ماأبيك

وإذا رجعت اصافحك
أبعد يديك

أنا انجرح قبل اجرحك
وأبكي عليك

لكن أبي مره تحس
وشلون أنا أمووت فيك

هي التفاصيل الصغيره
اللي تخلينا نحب

ماأحب أنا أقسى عليك
أقسى أنا لأني أحب

***

أدري فيك تموت فيني
وأنا ميت من برودك

لي متى وانتا تبيني
وماتحسني بوجودك

ايه ... حسسني بوجودك

لمّ صوتي
بعثر حكاية سكوتي

لاتخلي الحب يفقد همسك العذب ويمووت
قل احبك ..
قل احبك بأعلى صوت

انا مليت السكوت


***

ياإبتسامة قلبي ولهفة حنينه
ياشقاه وياحنانه

يابعد كل المسافات الحزينه
معك امانه

الدروب اللي مشينا .. لاتضيع وتغترب

بالتفاصيل الصغيره
نقدر نعيش ونحب

[اميرة احلامي]

عيـن بـدوي


وأتذكر كيف عشت اللي مضى لي من غيـا
من غيابك لين هذا اليـوم والهـم اسـروي

حالتي صعبه وضيقـة خاطـري قلـة حيـا
منطوي وأحس فيني شـي مثلـي منطـوي

من بعد ماكان هـذا القلـب مربـاع أخويـا
ضاقت الدنيا عليـه ولابقـى منهـم خـوي

هيه ياللي همس صوتك نور..وحروفك ضيا
ليت صمتك موت وأشرب من فراقك وأرتوي

ودي أدري قبل ماأحيا كيف أموت ولا حيـا
كم تعبت أموت وأرجع مثل خلق الله سـوي

يالحقيقه في الزمان الممتلـي كـذب وريـا
مابقى لي غير كلمه قبل ماالصـوت يهـوي

أقسم برب البروق اللـي كمـا مبسـم هيـا
أنك أغلى من بكور الوسم في عين بـدوي

[اميرة احلامي]

فقدت في الشــده


فقدت في الشـدّه حبايـب وخـلاّن
هانت عليهم عشرتي بس ماهنـت

خانوا .. وقلت أن الزمن مثلهم خان
لكن بعد ماشفـت زولـك تطمّنـت

عرفت من فقدي لهم أنـي أنسـان
ماعاد باقي له من العالـم الا أنـت

أنت السبب ياقلب في كـل ماكـان
مشكور ياقلبي على الطيب وأحسنت

في خاطري كلمه على حد طوفـان
بقولها .. واليوم شفتـك وهوّنـت

لكن تذّكر للأسف قـدر الإمكـان :
أن الجفا رجّال وأن الوفـا بنـت !

[اميرة احلامي]

ذكــريات


كـلٍ يغنـي علـى لـيـلاه
وانـا علـى حالـي أغنـي

أحيان عقلـي احسّـه تـاه
واحيان افكّر واقول : انـي

حزين..صـدري مدايـن آه
ضايع بخت من ضعر سنّـي

غريب ربع وطريـق وجـاه
وحيـد مااحـدٍ درى عنّـي

غاوي شعر والزمن شلفـاه
تنهش ضلوعـي وتطعنـيّ

يلعن ابو الشعر يوم اقـراه
وش جاب لي وش خذا مني؟

اظمااااه واشربه لين اظمـاه
وبأمـوت ظاميـه لكـنّـي

لو مااوزنه وانكسر لرضـاه
راحـت قوافـيـه تلعّـنـي

في الذاكره شيّ لـو انسـاه
يمكنـي اعيـش متـهّـي

في الذاكـره دمـع..لاوالله
فـي الذاكـره طفـل يغنـي

ليت الاماني جبـل وارقـاه
وانسى همومـي وينسّنـي

مايدري انّي علـى ذكـراه
يمكـن ابقـى ...ويمكنّـي

اترك طريق الشعر واجفاااه
واموت مأحـدٍ درى عنـي

[اميرة احلامي]

سـؤال


لاتكّدر خاطـرك ضيقـة حبيبـك يـوم قـال
أيه أحبك يابعدهم بـس أنـا ويـن آغـدي

ضيقتي ماهيب بس اليـوم يابنـت الحـلال
ضيقتي لها ثلاث سنيـن تاكـل مـن يـدي

ضيقتي مافي وفاهـا يابعـد عمـري جـدال
كل ليلـه تبسـط يديهـا وتفـرش مرقـدي

ودي أسكت بس أعرف الحظ لامن مال ..مال
لي متى والصمت ينهش في ضلوعي وجسدي

شوفة عيونك..هموم وضيق خلق وقل حـال
وش أسوي دام حظـي يابعـد عمـري ردي

هي كذا عيشة حبيبك لـو تظاهـر بالكمـال
أقرب أيامـه سعـاده بعدهـا بعـد الجـدي

هي كذا وأنتي بكيفك ..بس باقي لي سـؤال
فيه دمعه في عيونـي تنتهـي أو تبتـدي؟!

كلهـا مابيـن كلمـة روح أو كلمـة تعـال
كلمةٍ منها أضيـع ..وكلمـةٍ فيهـا آهتـدي

هذا كل اللي بقوله..وأعـذري قـل الوصـال
والله أدري بك زعلتي بس أنا ويـن آغـدي

[اميرة احلامي]

غمازتين وسله

أشتاق / لك
وأوقف على مطلع شعر قلته خبال وراق / لك
وأدوّرك
أنا أذكر أني قلت / لك
الشعر هذا مايليق ..
وجاوبت ِ : لكن لاق / لك

* * *

شيطانه أنتي
ماتحبي من بناتي الا بنتي اللي أنتي فيها بنتي
كم صار لك يابنتي
ماعاد بيّنتي
مدري ليه ! ..
يا أنتي كنتي منتي انتي يوم شفتك !
والا شفتك ..
يوم انتي منتي كنتي أنتي !

* * *

يا اجمل من عيون خل ٍ ينتظر خله
بغمازتين وسله
فيها سحاب وعيد
وطيور مبتله

* * *

آه لو تجي ..
تسقيني الحب الغزير
وأخذها بيديها وأطير ..
مدري لوين !؟
لكن أطير ..
ومتى ماينهكنا الهوى
أذوب وتذوب .. وتمرنا أسراب الغيوم
وأصير أنا غيمه
وتصير هي غيمه
وأسيل أنا فـ وادي
وتسيل في وادي
وأقول للمفرق :
محدٍ سأل عني أو مر من حولك
ويقول لي المفرق :
أسمع سراب أصوات فيها من هطولك
وأظنها كانت
لـ أهل ٍ ينادولك
وأصيح به : تكفى
يامفرق الوادي
أنا هنا مليت
مادلني أصحاب
ولا دلّني غادي
قبل انطفي وأجف
(خذني على بلادي)

[اميرة احلامي]

تحت الأرض أحبك

مي هذي مثل طلّ الصبـح لأغصـان الحدايـق
يبتسـم قطـر النـدى لاباسـتـه أو باسـهـا

مي هذي بنت لامن شفت صدر الليل ضايـق ..
أدري ان عيون مـيّ اليـوم طـال نعاسهـا !

من هنا تصحى ويصحى الحب في عيون الخلايق
ومن هنا تغفى وتنسى الارض ضحكـه ناسهـا

يسعد الله قلب ميّ اللي كثـر ماهـوب بايـق ..
..من قلوب الخلق..مااذكر مـرّ يـوم وداسهـا

لأن مي أرق بنت..ولو قسـت ماهـوب لايـق
حيّرتني مي..الأجمل : هـي..والا أحساسهـا !؟

بالها لاضاق زانت..كيف لامن صـار رايـق!؟
في انتباهتها براءه..كيـف اجـل هوجاسهـا !؟

العمر لو كـان ضحكـه مـي تكفينـي دقايـق
بس اخاف ان مت..تحني مـي فوقـي راسهـا

مي لـو تبكـي لموتـي مالـي الا افـز فايـق
من قبل لاامـوت أكثر..مـن نشيـج انفاسهـا

مي .. لاتعطين بال لمن يقـول المـوت عايـق
الجسـد موتـه يفـك الـروح مـن حراسهـا

ماأحبك فـوق الارض وبـس ياكـل الخلايـق
حتى تحت الارض أحبـك يابعـد مـن داسهـا

مي لو ماقلـت فيهـا بيـت واحـد ماتضايـق
لأن مالي شعـر ينشـر لـو رفـض كراسهـا

[اميرة احلامي]

الحــسد

الشعر أبـوي .. ولا بعـد قلـت : لبيـه
إلا ل( بحّة وزنـه ) و ( صـوت قافـه )

ماقبلـي أحـد ٍ قـد تربّـى علـى يديـه
ولاغيري أحـد ٍ سْمْـع صوتـه وشافـه

أغليه .. وأخافه .. وأحبّـه .. وأداريـه
وأخـاف لاأفقـد دهشـتـي فأكتشـافـه

على كثر مـا أبيـه وأتعـب وأنـا أبيـه
ماقـد شكيـت لغيمتـه مــن جفـافـه

إن ألتفـت فـي حالـي .. الله يحيـيّـه
و إن ما ألتفت .. ما ألحقت عمري حسافه

يامـا علـى غفلـه غرقـت فشواطيـه
وياما رمى فـي قـاع صوتـي ضفافـه

وأمسيت أغني له .. وأشيله .. وأشاكيـه
كنّـي مكـوّم كــل مـاكـان طـافـه !

أحـاول أقـوى شـي مانيـب قـاويـه
وأحـاول أقبـل شـي نفسـي تعـافـه

اسمع من هـروج العتـب والمسافيـه ..
مـازوّد حـمـول التـعـب والمسـافـه

نـاس ٍ بلونـي بالحسـد والمشـاريـه
مافيهـم اللـي وسـط قلبـه مخـافـه ..

لا .. والمصيبه .. ويش أنا منحسد فيه ؟!
في الشعر , ودروب السهر , والكلافـه !!

قولوا لذاك اللي ( سهادي ) علـى ايديـه
وش جـاه منـي ؟! لعنبوهـا ضعـافـه

ان كان حاسدني علـى الشعـر والتيـه !
يجـي يبادلنـي .. وأخـط أعتـرافـه :

يعطينـي راحـة بالـه الـلـي تقـدّيـه
وأيامـه الـلـي ماتـعـرف الصـلافـه

ونذر ٍ علي لأعطيه .. وأعطيه .. وأعطيه
حتـى يمـلّ مـن الشعـر والصحـافـه

[اميرة احلامي]

الأســرار

يا رفيف الماء .. وفجر العيـد .. وأحـزان الموانـي
يا أكثر أهل الأرض طيبـة قلـب .. وأسـرار دفينـه

المكـان اللـي هنـا .. مليـان ضحكـات ، وأغانـي
والكـلام اللـي بغيـت أقـول .. يحتـاج ل سكينـه !

شوفي الركـن البعيـد هنـاك .. كنـه صـدر حانـي
هـذا هـو اللـي يليـق ب شاعـر وبنـت حزينـه!

أنسـي الشـارع ، وعتمـات الزوايـا، والمبـانـي
هاتـي يدينـك نلـف الغـيـم ونشـكـل مديـنـه !!

عنـدي الليلـة كـلام وصمـت .. وأخـاف الثوانـي
تظلمه .. أو تظلـم اللـي فيـه كـم ضاعـت سنينـه

بـس لازم تسمعـيـن الـلـي أبــي ولا تـرانـي
لو ب أعيده لك .. نسيت .. ورحت أقول اللي تبينـه

شي واحد قبل ما أبـدأ .. مـا أبـي أي شـي ثانـي
يخطر ف بالك .. وأنا أكشف لـك شعـور تجهلينـه !

إن أنا .. وبكـل مـا تحملـه "أحبـك" مـن معانـي
كنت،وراح أبقى أحبك .. لين .. مدري وش هو لينه !!

بـس والله ماقـدرت أنسـى .. ولا همـي نسـانـي
لا ذكـرت إنسـان .. فيـه أسـرار مابينـك وبينـه

كـل مـا تطـري علـي فكـرة هــواك الأولانــي
أشعـر إنـي أنطعـن مليـون مـره مـن يديـنـه!

أشعـر إن عيونـك.. الله مـا خلقهـا إلا عشـانـي
كيف كانت تبتسـم لـه؟!.. قولـي إنـك تخدعينـه !!

صورة إنـه كـان يمسـح دمعـك .. تزلـزل كيانـي
وكيف كـان يلـم شعـرك .. ويتبعثـر فـي يمينـه

حتى اسمـك يـوم رحـت أدلله .. حظـي رمانـي..
بنفس الاسم اللي يقول .. بذمتـك ماهـي غبينـه !؟

وكنـي اللـي .. كـل مـا أناديـك بالاسـم الفلانـي
أطلـب النسيـان .. يتـرك منـه شـي تذكرينـه !!

لا تظنينـي أنانـي .. لا .. أنـا مانـيـب أنـانـي
لو سلمت من الغرق . بأمـوت فـي ظهـر السفينـه!

يا إني ما أكمـل وأعانـي .. أو أكمـل ثـم أعانـي..
كل ما اسمع طاري اسمه .. أو تجي عيني في عينـه!

أينا كـان الضحيـه ؟.. وأينـا اللـي كـان جانـي ؟
مـدري !.. ولكـن قـراري لازم إنــك تقبليـنـه:

مثـل مـا أكـره فكـرة إنـه واحـدٍ ياخـذ مكانـي
ما أقدر أجلس في مكـان إنسـان.. كنتـي تعشقينـه!

[اميرة احلامي]

الطفل والمحــارم

كــــان في وسط المدينه...
طفلٍ أكبر من سنــــينه..

والده مات بحنــــانه..
ولاقعد يندب زمانه...

صادق هموم الشوارع ..
يمسح الدمـــع ويصارع ..
طفل لكن كان بارع ..
مات ابوه وجا مكانه ...

يمسح أطراف القوايل عن جبينه ..
يبعد الشمس ويطاردها بيدينه..


طفل أحزانه معالم..
طيب وسمح ومسالم..

يمشي ويطوح بصوته ..
يبغى قـــوت أمه وقوته ..


المحارم....المحارم....المحارم ..
المحارم....المحارم....المحارم ..


ولا أقبل الليل ..ورحل وجه النهار ..
راح لامه مثل الأطفال الصغار ..

وأرتمى في ...حظنها ..
أرتمى في....جفنها ..
أرتمى في....حزنها..


وقامت امه تبكي لضيعة سنينه ..
وصـــــاح...يمه
ليه يــاعمري حزينه؟ ..
دمعتك يالغاليه والله ثمينه ..


تحسبين أني حزين؟ ..
لا..وراسك ما ألين ..
من لقى هذا الحنين ..
ينسى حزنه..
ينسى همه...
ينسى حتى العمر كله..
دامــــك أنتي تحترينه..


وفي صباح من صباحات الضياع ..
الحزن قدر يقول له الوداع ..


نـــــــــادت أمه...ماسمع ..
صـــــاحت أمه...مانفع ..
طـــــاحت أمه...مارجع ..


الصغير اللي ملى الدنيا صراع...
مـــــــات ....من كثر الوجع

[اميرة احلامي]

صالات المطار

قبل اسافر كنت جالـس فـي زمـان الأنتظـار
ارتشف هم المكـان .. و كـل همـي حاجتيـن

كنت خايف من يباس .. و كنت خايف من خضار
كنت اخاف انك تجين و كنت خايف مـا تجيـن

لين شفتـك مـن ورا بيبـان صـالات المطـار
مقبله من كثر شوقك .. كنت اشوفك تركضيـن

مرةٍٍ ركضـك يميـن و نظـرة عيونـك يسـار
و مرةٍٍ ركضك يسـار و نظـرة عيونـك يميـن

تايهة .. ما كنـك الا ضحكـةٍ وسـط انكسـار
ساكتـه .. ماكنـك الا دمعـةٍ فيـهـا حنـيـن

خايفة .. وجلة .. حزينة .. يعني كنتي بأختصار
تشرحين لكل جاهل معنـى كلمـة ( عاشقيـن )

بعدهـا جيتـك ولـدّت عينـك و دار الـحـوار
من كفوفـي دمعتيـن و مـن كفوفـك دمعتيـن

كنت اصد و كنتي انتـي ثايـره مثـل الشـرار
ماعلى لتغة لسانك غير كلمة ( وين ؟ ويـن ؟ )

واذكر اني رحت قبل ابـدي لـك ايّـة اعتـذار
رحت حتى قبل اطيّـب خاطـرك فـي كلمتيـن

لكن انتي عارفتني زيـن واللـي صـار صـار
سامحينـي واذكرينـي قـدّ ماانتـي تقـدريـن

اذكريني لاانتهـت للشمـس رحلـه مـع نهـار
واذكرينـي لاصحـى للصبـح ورد الياسمـيـن

واذكريني لا لمحتـي فـي ليالـي البـرد نـار
واذكريني لا سمعتـي للمطـر صـوت ٍ حزيـن

اذكرينـي واذكرينـي واذكرينـي .. بأختصـار
..اذكري فهد المساعـد قـدّ ماانتـي تقدريـن !

[دانة الدنيا]

أميره أحلامي

يعطيكـ الف عافيه

مجهووود رائع من أنسانه أروووع

لشاعر مبدع يستحق كل التقدير

لكـ مني كل الشكر والاحترام

http://www.lordaan.com/vb/images/smilies/redface.gif

[احاسيس]

اميره احلامي
آلفَ شكـًرٍ وٍآلفَ تقـــدٍيــرٍَ ..!!
وٍلطــرحكَ آلرآإئـعَ .. وٍقصيدتك آلشيــقه..!!
وآنتقآئك للموٍآضيـع المذهـل..والإبــدآع الدآئـم..!!
فــإلـى الآمــآم..ويعطيـك آلـف عـآفيــة..!!
لك فآئـق ..تقديـــري وإحترآمــي..!!
ارق تحيه

[اميرة احلامي]

أميره أحلامي

يعطيكـ الف عافيه

مجهووود رائع من أنسانه أروووع

لشاعر مبدع يستحق كل التقدير

لكـ مني كل الشكر والاحترام

http://www.lordaan.com/vb/images/smilies/redface.gif



دانووو

حضور متالق شااامخ


لا عدمت اطلالتك العطرة

لقلبك بساتين ورد

[اميرة احلامي]

اميره احلامي
آلفَ شكـًرٍ وٍآلفَ تقـــدٍيــرٍَ ..!!
وٍلطــرحكَ آلرآإئـعَ .. وٍقصيدتك آلشيــقه..!!
وآنتقآئك للموٍآضيـع المذهـل..والإبــدآع الدآئـم..!!
فــإلـى الآمــآم..ويعطيـك آلـف عـآفيــة..!!
لك فآئـق ..تقديـــري وإحترآمــي..!!
ارق تحيه


احاسيس

كل الروووعة باطلالتك العذبة الراااقية

لك بساتين ورد

[ALMALKI BOYS]

الله يعطيكي الف عافيه اميره


وننتظر جديدك

[اميرة احلامي]

الله يعطيكي الف عافيه اميره


وننتظر جديدك


ماتريكس

يعافي قلبك

لك امتناني لتووواجدك

[@منتهىالرقهـ@]

اميره

يعطيك العافيه

[ملكة بأنوثتي]

يعطيك العافية على الموضوع

لك ودي